第16章【一個人制霸全日本都道府縣】香川県：小豆島 @ 青青一個人制霸日本都道府縣

第16章 Day1【 香川県：小豆島 】2015-04-30 [值得嚟嘅程度 LEVEL 9/12]

☞ 去咗關西地方同埋中國嘅地方，應該感覺上去埋四國咁西日本地方去得有啲完整。無錯，所以兩個月後又再自飛六日嚟四國玩喇，展開第三章旅程，Shikoku Wonder Quest。

自己係一個普通嘅香港打工仔，趁後生三十歲前，自己無咩負擔嘅時候，訂立一個目標去，兩年時間內 (12/2014 - 12/2016) ，分開17次時間，唔識日文情況下，自己一個人遊歷日本47個都道府縣，日後時間都可以令自己回味。

☞ http://ao37182.pixnet.net/blog/post/213131848

☞ FACEBOOK : https://www.facebook.com/chinginjp/

按進入以連結有更多介紹啊❕

值得嚟嘅程度	按進入以連結有更多介紹
Level 10/12	大阪府：難波 / 心斎橋 / 日本橋
Level 10/12	京都府：宇治川
Level 09/12	京都府：大原
Level 11/12	京都府：伏見稲荷
Level 10/12	京都府：鞍馬山
Level 12/12	滋賀県：余呉湖 / 琵琶湖
Level 11/12	京都府：天橋立
Level 07/12	京都府：伊根の舟屋
Level 10/12	京都府：嵐山
Level 10/12	岡山県：岡山後楽園
Level 08/12	島根県：出雲大社
Level 12/12	鳥取県：鳥取砂丘
Level 10/12	山口県：秋芳洞 / 秋吉台
Level 12/12	広島県：厳島神社
LeveL 09/12	山口県：錦帯橋
Level 09/12	香川県：小豆島
Level 10/12	高知県：桂浜

===================

香川県：小豆島

===================

【去埋四國齊整啲？】

☞ 當我去嗰陣仲未有廉航直飛去四國，所以都係靠搭peach先去到大阪再轉新幹線去到岡山先。然後再轉其他JR列車去四國嘅高松站。搭整個路段繼三個幾中，其實係兜一個勁大嘅彎先去到，但冇法，如果搭鐵路就要咁去。

☞ 到咗四國高松站落車，都成十一點幾。喺出面幾高松站好特別，全車站係兩層高，外面係用玻璃做幕牆。而玻璃牆貼咗一個笑面喺度，真係好得意。日本嘅車站就係咁靚，好有心思。

☞ 其實都肚餓，所以食去車站樓上一啲舖頭食晏先。香川縣係最出名嘅係讚歧烏冬，原產地就係喺四國呢度。所以我叫咗個普通嘅牛肉烏冬面加腐皮壽司嘅餐嚟食，睇啲烏冬係唔係特別好食。不過就覺得正常烏冬，感覺唔到有咩唔同。

【揾酒店驚行錯路】

☞ 食完就第一時間先去揾酒店放低個行李，都知要行成十五分鐘，不過行咗陣都未見間酒店係咩位置。大路嘅地方就清楚知道，但當自己入去啲橫街小路真係唔清楚自己喺邊。其實行行吓自己覺得入咗去一個工廠區咁，因為時不時都有好多大型嘅貨車經過，真係好大架，但係條馬路唔係闊。當啲貨櫃車高速行過心有時都會離一離。

☞ 行多陣開始懷疑自己係唔係行啱路，一來附近係啲工廠，二來附近我都唔見有其他酒店喺度。雖然印咗地圖但真係連自己啲地圖都唔太信，因為自己行入咗去啲橫街淨係見到民宿，一啲有酒店嘅跡象都唔覺。仲要啲橫街係入咗去，自己唔知行緊邊，想出嚟都唔知喺邊。最記得有個油站兜咗幾次添。

☞ 本來想問人，但人都唔多個，好在最後都揾到，真係唔容易見到。原來間酒店係喺船廠隔離，點估都估唔到間酒店係啲廠旁邊。間酒店其實都幾普通，同啲民居外型差唔多，從外表睇唔覺得係一間酒店模樣嚟。

☞ 酒店裡面都好簡單，地下接待處似係茶餐廳收銀嘅櫃台咁。入到間酒店發現都有啲破舊，牆身到有爛嘅痕跡，不過都算OK，可以接受到。

【出發去小豆島】

☞ 放低行李就即刻出去玩啦，行返去高松站嘅附近先去，中途見到啲上班族啱啱放完飯返上公司。佢哋大部份裝束都係黑色外套白色恤衫，非常齊整。

☞ 去到高松站嘅隔離馬路有一個碼頭係去小豆島，快船半個鐘就到。見仲有時間就換張日本電話咭手機，不過入咗之後冇反應嘅 ❕ ❔嚇死我，因為咁啱後新電話，諗緊係唔係支援唔到。因為新電話係雙咭功能，但就只有一個咭槽先可以讀數據。如果唔係真係唔知點算，幾日冇網上功能，肯定盪失路，連揾酒店都咁複雜。

☞ 上到架船，係一架細船嚟，都好快，半個鐘就到。因為我未試過坐啲快船，感覺快得嚟唔幌。去到小豆島淨望到個碼頭，周圍都冇好似廣島宮島，有咁多指示。因為小豆島其實係啲民居嘅地方，所以唔會有特別為遊客嘅指示，好彩自己一早印定個地圖，唔係就企咗喺度。

【慢遊小豆島】

☞ 其實嚟小豆島有兩個特別嘅地方要到，一個係全世界最細嘅海峽，同埋潮退先見到嘅天使之散步道。我落船就租咗架單車踩去，因為小豆島都唔駛細，而且島上嘅巴士又疏，去呢兩個景點踩單車就係最好。

☞ 喺島上踩單車真係好舒服，冇咩人車又唔多，好悠閒咁去踩，可以細心感受當地民居悠閒嘅氣息，自己個心都平靜咗落嚟。慢慢踩就覺得自己都好似係當地人踩住單車附近行行走走，其實真係唔錯。中途都見到有巴士站喺度，最可愛係啲巴士站好卡通，而最得意係啲巴士站地上放咗兩粒豆豆嘅公仔喺度，超正，望見都好開心，感覺個島嘅人民係好有呢個地方嘅歸屬感，好難得。

☞ 踩到附近休息一陣，係一個好似公園仔嘅地方唞。之後自己先發現我自己已經到達咗世界最窄嘅土淵海峽，其實望落去同普通河流一樣。既然到此一遊都影返張相先。當開埋個腳架影嗰陣先發現我腳架伸長部份嗰粒的爛咗 ❕不過好彩唔係裡面仲有啲油可以頂住。因為發覺原來我自己係拎咗舊腳架嚟，真大意。

【天使之散步道】

☞ 繼續向前行，但望望隻錶啲時間已經係三點，記得潮退時間係三點半左右，而且五點就收檔，所以嗰刻我即刻踩行油，咩景咩感受都唔理，盡快去到天使之散步道。望住地圖以為好快就到，但行咗好耐，上埋斜都唔見差下樣嘅路，仲有準備入隧道嘅車路嚟添。自己又心急，所以冇辦法就當場問個洗緊車嘅人。佢好好人，詳盡咁話我點行，原來我過咗條分岔路口，要踩返轉頭。佢仲問我係邊嚟，就話香港。跟住佢都知我急急哋所以都冇同我傾咁多，一直踩返去啱嘅路口度。

☞ 幾個字後就嚟到天使之散步道，因為嗰度全部都係沙嚟，所以張架單車放埋一邊鎖好佢先出發去行。呢條散步道係因潮退嘅時候先會出現，所以被人稱為有緣份嘅人先會嚟到，亦都係好多情侶嚟到嘅地方。其實條散步道只係一條長型嘅沙路，有啲似天橋立咁，不過呢個當然迷你好多啦。行條散步道都好快行完，只係一條沙路連接住一個小島仔咁。

☞ 打個圈行完就可以上去個展望台，俯瞰整條散步道。喺上面見到好多人都影相，同自拍。初初我諗有對情侶不斷自拍就諗住幫佢哋影，不過佢初初聽唔明唔英講咩，仲以為叫佢幫我影。雖然最後知我係想幫佢哋影，但佢哋好似表現得唔太願意，可能我破壞咗佢哋自拍嘅情趣啦。