第11章Day2【島根県:出雲大社】2015-03-01 [值得嚟嘅程度 LEVEL 8/12]
自己係一個普通嘅香港打工仔,趁後生三十歲前,自己無咩負擔嘅時候,訂立一個目標去,兩年時間內 (12/2014 - 12/2016) ,分開17次時間,唔識日文情況下,自己一個人遊歷日本47個道道府縣,日後時間都可以令自己回味。
☞ http://ao37182.pixnet.net/blog/post/213131848
值得嚟嘅程度 | 按進入以連結有更多介紹 |
Level 10/12 | 大阪府:難波 / 心斎橋 / 日本橋 |
Level 10/12 | 京都府:宇治川 |
Level 09/12 | 京都府:大原 |
Level 11/12 | 京都府:伏見稲荷 |
Level 10/12 | 京都府:鞍馬山 |
Level 12/12 | 滋賀県:余呉湖 / 琵琶湖 |
Level 11/12 | 京都府:天橋立 |
Level 07/12 | 京都府:伊根の舟屋 |
Level 10/12 | 京都府:嵐山 |
Level 10/12 | 岡山県:岡山後楽園 |
Level 08/12 | 島根県:出雲大社 |
Level 12/12 | 鳥取県:鳥取砂丘 |
Level 10/12 | 山口県:秋芳洞 / 秋吉台 |
Level 12/12 | 広島県:厳島神社 |
LeveL 09/12 | 山口県:錦帯橋 |
Level 09/12 | 香川県:小豆島 |
Level 10/12 | 高知県:桂浜 |
===================
島根県:出雲大社
===================
【祈求戀愛@出雲大社】
☞ 呢日本來係去鳥取縣嘅鳥取沙丘,不過竟然係落雨,無理由落住雨行沙漠咁狼狽,所以就諗去邊好呢。我自己又唔想行街,其他嘅行程都計劃咗幾時去,唯一真係出雲大社。
☞ 出雲大社雖然喺日本好出名,因為相傳祈求戀愛運情都幾靈驗,特別十月份嘅時候好多唔同日本嘅神明都會嚟晒出雲大社,所以吸引咗無論國外定國內嘅人嚟參拜。雖然呢個地方係好出名,但如果要由廣島出發去出雲大社實在係遠得很。而且我對神社都冇咩特別興趣,因為覺得神社個個外型差唔多,而且自己又唔太認識當中嘅歷史,不過落住雨有諗唔到咩地方好去,唯有去吓呢一個勁遠嘅出雲大社睇吓。
☞ 大約九點幾起身,食埋早餐就出發。先搭電車去返廣島站先,發現咁樣去廣島站其實都幾麻煩,就係唔太遠但都收百幾円其實都幾貴。冇法啦,貪近廣島市中心嘅地方。去到廣島站第一時間係買張JR Pass先,因為呢日三月一號JR西日本有張新嘅Pass出售,叫Sanyin and Sanyo Area Pass,就係專俾去山陽同山陰呢兩邊嘅中國地方用,咁就唔駛好似尋日咁搭車要每程買飛同勁貴。
【搭...三...個...半...鐘...車...】
☞ 先坐山陽新幹線先由廣島去岡山先,然後轉車搭去出雲大社嘅山陰本線特急列車。咁我睇個行車時間係超過三個半鐘,同搭飛機由香港去大阪差唔多。
☞ 架列車都幾舒服,坐椅係有得拉向後。架列車係咁開,沿途啲風景由城鎮慢慢變鄉郊,然後有幾個山窿穿過。坐就幾舒服,而且都時不時瞓著又醒吓咁。其實我坐呢啲長途車都OK嘅,不過呢次真係好耐,我坐到瞓醒都仲未到,精神到唔想瞓。而且坐到Patpat有啲痛添,其實呢個過程都幾辛苦呀,又未到站但坐到好悶,都唔知可以點,唯有繼續坐。
☞ 好耐,真係好耐,第一次感覺到仲未到站但仲要坐嘅辛苦,嗰陣真係唔知自己點解要去呢度坐咁遠嘅車。幾經辛苦終於到站,出雲市站,點都要落車影返個車站同埋架特急列車,好似終於完成咗使命嚟到出雲市。跟住就係食嘢先啦,原來已經係兩點喇,咁都要食啲嘢嘅,就係車站一間舖頭食嘢。間舖頭淨返都唔係好多客,都係呢區啲本地人食嘢。
【坐巴士去出雲大社】
☞ 食完就即刻坐巴士去出雲大社,好好彩唔駛點等就有車嚟,搭咗半個鐘左右就到出雲大社前。落車嘅時間都已經係三點鐘喇,未試過去一個景點要咁咁咁耐時間先到。去到整條街都係買手信嘅地方,不過都唔好理住,因為神社係有閂門嘅時間所以當然要立即去出雲大社先啦。行都係五分鐘左右就到個出雲大社門口,佢個鳥居都幾大,如果好天影都應該幾靚,不過落住雨都係咁照影。
【1.5噸好大嘅連繩掛喺度@出雲大社】
☞ 入到去經過一條長長嘅參拜路,然後兩邊都有個好廣闊嘅園地。不過嚟得呢度當然重點係要去出雲大社啦,所以一定要先揾個神社喺邊先。都好快就揾到,當然神社唔會話好難揾同隱閉。去到當然欣賞佢最觸目嘅神社上面用掛住連繩,係用竹去串連一齊,都有1.5噸嘅重量,真係唔少嘢。我去到當然要摸一摸先啦,不過都唔敢亂掂,驚一陣整鬆咗點算,話晒本地人嚟參拜應該唔會咁跩攞手去掂佢同搞佢嘅。
☞ 影咗一陣再行去後面睇有啲咩啦,見有幾個石像喺後面,而其中有幾個係兔仔嚟添,幾得意。其實都冇太多嘢睇,除非想買啲護身符或者係祈求運程,唔係就好似我咁離開喇。
【5噸重嘅連繩掛@神樂殿】
☞ 初初以為出雲大社得咁多,離開嗰陣轉去右邊再望,咦?又有另一個神社嘅?同出雲大社嗰個一差唔多樣,亦都有個連繩掛喺度,但大Size大好多,仲非常弘偉。之後翻查後原來呢個叫神樂殿,氣勢非同凡響,就連掛喺神社嘅都大好多,有5噸重,感覺呢個神社好似大佬,把守住整個神社領域。見到有啲人都揸車入嚟,入去參拜。我見到裡面亦有類似法師為參拜人士行緊儀式,喺外面望入去好似好凝重,真係唔太敢行太埋白掛佢哋做咩,費時騷擾人哋。
☞ 自己都喺外面睇吓影咗一陣相就閃,周邊都冇其他特別嘢,而且時間都經已四點幾,返去廣島都要三個幾鐘,所以差唔多要離開。不過自己咁老遠難得嚟到呢度當然要買啲手信啦,不過附近商舖好多都差唔多收咗,唯有見到個細細哋嘅鎚仔寫上出雲大社當手信。
☞ 跟住沿路剛才入嚟神社條路出返去,經過手信街,離開少少出雲大社嘅範圍,想睇吓出雲市其他地方係點樣。望落去都係一啲民居地方,好寧靜。而出雲大社手信街出面就有一個用石製嘅大鳥居喺度,第一次見係石造嘅鳥居。
【一畑電車】
☞ 時間去到五點幾,本來沿路想揾返個巴士站,但中途發現有鐵路係可以返去出雲市站,就不如去試吓啦。之後原來係個車站裡面擺設都好靚,特別係仲有個雪人公仔喺度,但都已經三月喇。睇個時間表啱啱走咗一班車要等九個字先再有,咁係出面慢慢行陣街散個步都幾舒服,咁樣等吓車都幾正,睇住太陽落山漸漸變黑嘅情況。上到架列車發現啲坐位好特別,係一格格咁樣,有塊板隔住每一個座位,有啲一四個卡位圍住,好得意,不過坐落去感覺有啲窄,有塊板頂住都冇咁舒服嘅。
☞ 之後列車開到個叫川跡嘅站就要落車,原來要轉隔離架列車,就好似香港嘅輕鐵咁,喺地面落車行過另一個月台再上返車,幾特別,而且仲有職員引導我哋轉車添。去到出雲市就要轉返JR返去廣島,而搭嗰架七點幾嘅JR特急車亦當日嘅尾班車嚟,一上到去就開始進入返去要坐三個幾鐘車嘅歷程,全程窗外畫面都係黑色,都係有架列車行,我就有我自己瞓。
---------------------
出雲大社
---------------------
☞ 參觀費用 :免費
☞ 交通 :JR出雲市站,搭乘前往「大社線(南原経由)」巴士,「正門前」站下車 。(500円)
☞ 網址 : http://www.izumooyashiro.or.jp/
留言列表