第13章【一個人制霸全日本都道府縣】山口県：秋芳洞 / 秋吉台 @ 青青一個人制霸日本都道府縣

第13章 : Day4【山口県：秋芳洞 / 秋吉台】2015-03-03 [值得嚟嘅程度 LEVEL 10/12]

山口縣嘅秋芳洞，裡面嘅鐘乳洞都陰森恐怖，氣氛好神秘，都好特別幾正。

自己係一個普通嘅香港打工仔，趁後生三十歲前，自己無咩負擔嘅時候，訂立一個目標去，兩年時間內 (12/2014 - 12/2016) ，分開17次時間，唔識日文情況下，自己一個人遊歷日本47個都道府縣，日後時間都可以令自己回味。

☞ http://ao37182.pixnet.net/blog/post/213131848

☞ FACEBOOK : https://www.facebook.com/chinginjp/

按進入以連結有更多介紹啊❕

值得嚟嘅程度	按進入以連結有更多介紹
Level 10/12	大阪府：難波 / 心斎橋 / 日本橋
Level 10/12	京都府：宇治川
Level 09/12	京都府：大原
Level 11/12	京都府：伏見稲荷
Level 10/12	京都府：鞍馬山
Level 12/12	滋賀県：余呉湖 / 琵琶湖
Level 11/12	京都府：天橋立
Level 07/12	京都府：伊根の舟屋
Level 10/12	京都府：嵐山
Level 10/12	岡山県：岡山後楽園
Level 08/12	島根県：出雲大社
Level 12/12	鳥取県：鳥取砂丘
Level 10/12	山口県：秋芳洞 / 秋吉台
Level 12/12	広島県：厳島神社
LeveL 09/12	山口県：錦帯橋
Level 09/12	香川県：小豆島
Level 10/12	高知県：桂浜

===================

山口県：秋芳洞 / 秋吉台

===================

【出發去秋芳洞】

☞ 朝早食完松屋早餐就去廣島站搭新幹線去新山口站。因為新山口站唔算新幹線嘅一個大站嚟，所以唔會班班新幹線都會到，要等一班會去新山口嘅列車。去到新山口站之後就係轉巴士去秋芳洞嘅地方，一落車第一時間係睇啲返去嘅巴士幾時有車，唔係到時傻等或者冇車就麻煩喇。

☞ 天氣呢日就一般，陰天想落雨。去到一嚟兩邊都係賣紀念品嘅舖頭，仲有啲未開檔，嗰陣都九點幾嘅時間。之後再行入去係入去秋芳洞賣飛嘅門口，見到除咗有兩個女仔同我之外就冇其他人，其實呢啲地方係唔係冇咩人去呢，嗰陣都已經係十點幾嚟。

☞入到去經過一個叢林之後見到一個好高嘅山洞入口，個入口都比較黑，旁邊有啲瀑布嘅聲音沙沙聲。企喺個入口度都有啲震撼力，好似裡面都陰森恐怖，入去都有啲緊張。

【氣氛深寒嘅秋芳洞】

☞ 裡面真係幾黑，有射燈照住條路就好啲。裡面鐘乳洞都係靠側邊嘅射燈照住，通常都會照住一啲較特別同有代表性。裡面環境非常之大，個山洞係好高好廣，雖然睇唔太清楚有幾深，但係都感受到裡面深處，加上裡面其實有好多唔同大細嘅吊鐘，氣氛好神秘。除咗暗之外，周圍都比較濕，地下有時都會有水氹，甚至有泥氹喺，行嗰陣小心啲。裡面啲鐘乳洞都好特別，有啲似千層石級，有啲好大好粗嘅，有啲非常高，高度有幾層樓高。而且裡面都好大，要行晒快都要成一個鐘，有啲位要上樓梯再行去，感覺有啲迷宮咁。

☞ 遊人算唔多，都係得幾個人，所以啲回音都大，係中間嘅位置先會見到有啲旅行團喺當中，不過都係日本當地嘅人嚟。

☞ 裡面啲相我全部都係用相機影，手機基本影唔到相，影出嚟係全黑，而相機都要開閃光燈先影到，效果都算正常，係影嘅時候曝光要耐少少。不過當要開閃光燈時其實好閃，都有啲尷尬驚騷擾其他人。

☞ 雖然有各種類別嘅吊鐘，而且每個都有唔同語言介紹，但我冇太大興趣了解佢嘅本質，淨係覺得唔同形狀好有趣。

☞ 走到尾段有突然好光，兩邊都有一啲地球同生物演變進化嘅過程。行嘅時候都有啲音樂喺旁邊，感覺好似行緊時光隧道咁，一直行一直回顧地球嘅歷史咁，感覺有啲類似人類對地球嘅未來有所覺悟。我覺得呢個好好睇，加上啲音樂配襯好正 ❕再行上去就係地面嚟，係秋芳洞嘅出口。

☞ 當時我企喺嗰度周邊都冇咩人，亦都唔見有巴士站，因為睇書話可以由呢度搭巴士上去秋吉台，然而旁邊有個詢問處就行過去問。不過佢話依加冇巴士嚟，不過行去都係十五分鐘到，仲教我沿著山路行就見到。初初都有啲擔心會唔識行，但沿途都有好多指示教去秋吉台，行咗一陣就見到，但係呢個時候就落喺雨嚟。

【好廣闊嘅秋吉台】

☞ 秋吉台其實同秋芳洞係連住，秋吉台係一個好廣闊嘅高原嚟，但撞正落雨，而都唔細，但嚟到點都要行吓啦。基本上全個高原地方得我一個行，感覺自己有啲奇怪，好似全個地方都係俾我去行。其實個高原位置都連住唔同嘅山頭，如果好天嘅時候真係幾靚。唔知我去嘅時候係唔係燒過呢遍地，因為望落去好多草都係有燒過嘅痕跡，而且都好大片地方都係咁。

☞ 沿路一直行到高原上嘅山頭，落雨令到地下變成泥地同埋水氹，行上嚟都有啲麻煩。跟住一直行就去到高原上嘅山頭，非常荒蕪。最後逗留咗一陣之後就離開，始終啲雨都唔細。落返去係雖要行返沿路去，途中真係冇咩人嚟，不過落返山嘅都舒服啲，然後再經沿路入去秋芳洞，再經過黑暗嘅山洞再行返出去賣飛嘅入口離開。嗰陣都成大約一點鐘，望一望下一班巴士係一點半。既然有時間就去買返啲記念品先再搭巴士，唔係下一班要等到三點幾先有車。

【人流稀疏嘅新山口車站】

☞ 返到去新山口站第一時間當然係食嘢先，去車站間餐廳食咗個飯，而店裡面都只係得幾個食客，當然啦，兩點幾喎。之後望個車站行吓睇有咩特別，呢個站俾我認識新幹線站有啲唔同，好靜，人流好少，唔似得岡山站同廣島站咁繁忙，比其他普通站仲少。站都算大但空廣冇人，所以呢次係我第一次認識新幹幹線車站一啲唔係主要站嘅環境。

【想去去下關，但最後取消】

☞ 之後計劃去山口縣嘅下關，嗰度有一個下關塔係可以睇夜景，諗住坐新幹線去新下關站再轉下關站落車，但去到月台一睇，下一班去新下關嘅新幹線要等成個鐘，吓 ❕真係冇諗過咁耐，因為通常我由岡山來回廣島都係兩，十五分鐘一班車，但要去新下關站竟然係一個鐘後。其實新下關站唔係一個重要嘅車站，所以好多新幹線由新山口站再去下一站已經係九州嘅博多站。

☞ 咁見等咁耐就諗我搭普通列車都應該快過去到新下關，或者直接到下關站。我轉返去搭普通列車嘅時候，冇耐先發現自己係搭錯咗方向，返去廣島嘅方向，因為列車車箱雖然有路線圖，但冇任何指示架列車去緊邊。當我發現自己搭錯方向，就即刻喺下一站落車，個站叫大道，唔知咩站嚟，亦係一個咩都冇嘅站嚟，得月台售票處嘅職員。我唔知下一班車幾時就問個職員，而佢話要等一個鐘就有列車。唉，咁搞早知就乖乖哋坐新幹線去，依加後嘥咗勁多時間。

☞ 咁個大道站周邊除咗一間中學就見唔到其他嘅大型建設喺附近。下一班車到咗，但係冇直接搭普通列車去新下關，直接咗返新幹線，費事一陣搭錯JR同去錯方向，但去到新山口站又要有程等成一個鐘。

☞ 終於到新下關站，但個陣都經係七點，然後再睇時間表，去下關站原來又要等幾個字。當時我覺得勁晒時間去睇夜景，去到都八九點，所以最後都係取消返去廣島，所行返廣島市嘅本町。嗰度有咁多地方購物，我覺夜晚始終係行城市嘅地區好啲。

☞ 喺呢日真係認識咗新幹線原來有快慢版，同埋一啲唔顯眼嘅新幹線車站都幾荒涼。