第12章【一個人制霸全日本都道府縣】鳥取県：鳥取砂丘 @ 青青一個人制霸日本都道府縣

第12章 Day3【鳥取県：鳥取砂丘】2015-03-02 [值得嚟嘅程度 LEVEL 12/12]

整遍金黃色嘅砂丘完全喺我眼前，好震撼 !

自己係一個普通嘅香港打工仔，趁後生三十歲前，自己無咩負擔嘅時候，訂立一個目標去，兩年時間內 (12/2014 - 12/2016) ，分開17次時間，唔識日文情況下，自己一個人遊歷日本47個道道府縣，日後時間都可以令自己回味。

☞ http://ao37182.pixnet.net/blog/post/213131848

按進入以連結有更多介紹啊❕

值得嚟嘅程度	按進入以連結有更多介紹
Level 10/12	大阪府：難波 / 心斎橋 / 日本橋
Level 10/12	京都府：宇治川
Level 09/12	京都府：大原
Level 11/12	京都府：伏見稲荷
Level 10/12	京都府：鞍馬山
Level 12/12	滋賀県：余呉湖 / 琵琶湖
Level 11/12	京都府：天橋立
Level 07/12	京都府：伊根の舟屋
Level 10/12	京都府：嵐山
Level 10/12	岡山県：岡山後楽園
Level 08/12	島根県：出雲大社
Level 12/12	鳥取県：鳥取砂丘
Level 10/12	山口県：秋芳洞 / 秋吉台
Level 12/12	広島県：厳島神社
LeveL 09/12	山口県：錦帯橋
Level 09/12	香川県：小豆島
Level 10/12	高知県：桂浜

===================

鳥取県：鳥取砂丘

===================

【去鳥取站兩個鐘一班車 ! 】

☞ 起身食牛肉飯早餐出發去尋日想去嘅地方，鳥取砂丘。先去廣島站搭新幹線去岡山站再轉特急列車去鳥取站。

☞ 到岡山站就揾去鳥取方面嘅月台，見到月台有個時間表，我係搭九點幾班特急列車去鳥取，再睇下一班要成十一點幾先有？我初初諗係唔係我自己睇錯，定係特急先係，如果普通慢車應該有掛。但點睇都係冇，因為時間表有個鳥字就代表去鳥取，而其他時間就冇呢個字，係去其他地方。心諗錯過咗呢班車咪唔駛去，十一點幾先有車去到都成一點幾，再轉埋巴士埋兩三點。嗰陣我先知到日本啲郊區列車其實隔咁耐有車係好普遍，而且由岡山去鳥取其實都好遠。嚟嗰陣係得兩卡列車嘅特急鐵路，得兩卡咁少？但上到車上面睇真係唔多人去搭，每卡唔過十個人，唔怪得咁少車卡同班次咁疏喇。

【鳥取市搭巴士去鳥取砂丘】

☞ 今次坐車都係大約兩個幾鐘就到鳥取站，落咗車都十二點左右，然後搭巴士去鳥取沙丘。等巴士都只係等咗幾個字就有車，不過我通常都會小心啲睇吓嗰架車係唔係去鳥取沙丘，因為呢啲巴士一miss咗就等勁耐，最好都係睇清楚好。坐巴士都唔係好耐，由鳥取市出發去到沙丘地方。

☞ 一開車架巴士先兜個市中心先，沿路見到啲舖頭都係簡樸，門面都係簡單，唔似大阪啲舖頭咁搶眼，應該係為當地居民生活所需，而且有啲舖頭冇開檔，感受到真正日本人佢哋偏遠城市地方嘅生活係點。我覺得好清閒，節奏好慢，完全同我喺大城市行嘅街嘅感覺差好遠。

☞ 之後架車進入咗郊區地方，再過一陣就見到遠處有一大遍金黃色嘅地方喺度，都肯定係我想去嘅目的地鳥取沙丘。喺巴士窗外望見時自己心裡面都好興奮，忍唔住都叫咗嘩一聲，因為實在太震撼喇，可能自己一直都未見過砂丘咁特別嘅景象。

【一大遍金黃色嘅鳥取砂丘】

☞ 一落巴士都幾大風，近距離望見鳥取砂丘嗰種比剛才隔住巴士窗口望落去更加震撼，一望整遍金黃色嘅砂丘完全喺我眼前，仲係要大得好緊要，完全望唔到盡頭，自己覺得變得好細小。據說砂丘嘅形成係類似土壤侵食而引起，一行入去裡面基本上冇咩目標應該點行，因為實在太大，其實點行都得。喺入去嗰陣隻腳都好容易俾啲沙沒埋，有時都幾難行架，最好著對水靴，或者當地免費借對著住。即使難行，但對住個無敵景色完全冇卻步嘅打算。啲沙好幼細，踩落去綿綿哋好舒服。

☞ 一直行去砂丘嘅前面有一個水氹，係一遍砂丘之中點綴出嚟嘅景象，而背後就有個似砂丘山嘅地方，可以爬上去，可以望得更遠更多。望就去唔太遠，但行去加上喺沙上面行點都有啲難度，但係慢慢咁行去其實唔錯，好天氣加上砂丘自然嘅景實在令人陶醉當中，不自覺係咁影咗好多相，好影到出砂丘嘅震撼美。

☞ 行上去斜坡上，其實都幾難行，行得唔好真係會跌返落去，不過全部都係沙我相信都唔會好痛嘅，但行上去最高位開始越嚟越斜自己都有啲企唔穩，要一步一步慢慢上。有好多其他人都去到最高位專登跌落嚟去返地面，好刺激。

☞ 喺砂丘上影相我最覺得困難係要揾一個靚景去影真係有難度，因為砂丘呢個畫面好難捉摸真正嘅輪廓。個景實在太大，加上唔知點影先影到砂丘獨特嘅地方，唔係好似影一個普通嘅沙灘咁。

【最高處眺望日本海】

☞ 上到最高一望就係一個無邊際嘅海嚟，就係日本海嚟，因為鳥取砂丘位置係鳥取縣海岸邊嘅位置嚟。第一次望到個日本海係咁廣闊，而且海浪嘅衝擊都幾大。企喺上面自己都覺得好正，雖然好大風，但上到嚟望咁大嘅海，再回望剛才我行嘅路，原來已經行到咁遠，啲人已經變到咁細粒，映襯自然界嘅宏大。

☞ 喺上面亦都見到啲人玩降傘，不過我諗都唔平而且好想繼續周圍係咁影相同感受企喺砂丘上同吹起嘅風聲。

【喺日本騎駱駝！】

☞ 欣賞咁耐砂丘嘅靚景，臨走坐駱駝騎，雖然都只係附近走走，冇行到好遠，不過我第一次騎駱駝我覺得好過癮好正。

☞ 坐喺佢嘅駝峰之間一路行一路遙都有驚跌落嚟，不過有專人喺旁邊睇住騎。收費都唔平，同隻駱駝影相加埋騎上去要1300円，但只不過騎幾分鐘就完，不過可以喺日本騎到駱駝我諗只有得呢度。本來仲有個砂丘美術館，不過冬天唔開就冇計。個館係集合全世界用沙砌成嘅作品，見有啲幾誇張係砌個城堡出嚟，可惜冇得睇。

【搭吊車去砂丘瞭望台】

☞ 坐完駱駝就搭吊車，即係個人坐上去，周邊得一個扶手載上去瞭望台，中間會有一個鏡頭影咗你相，然後去到頂上就問你要唔要嗰張啱啱坐緊吊車上面張相。張相就冇咩特別，不過難得一場嚟到就要一張。上面反而冇特別嘢睇，就算望返去砂丘地方都唔覺得好靚，遠望係一個普通嘅景嚟同埋旁邊有一個食堂同買手信嘅地方。行咗陣買咗少少手信就離開，準備搭巴士走。

【返去鳥取市食嘢】

☞ 搭巴士等車都成日有啲擔心會miss咗班車，所以要留心。咁啱有車嚟，但唔個方向唔係鳥取站，但個時間又差唔多。當時有少少衝動想上去，不過最後都冇。當架巴士走咗我自己一直喺度問其實嗰班車係唔係㗎？可能係喎，啱啱走咗再等要成個鐘先有車。不過好快又有另一架車埋嚟，係去鳥取站嘅，所以搭日本巴士有少少令自己緊張。

☞ 去到鳥取站都三點幾，本來係諗住去岩美嘅地方所以先咁快離開，不過我check下一班去岩美嘅列車係夜晚七點幾？本來唔多信，但跟住諗不過呢啲日本郊區鐵路真係唔好用平時大城市嘅班次去理解。既然都係夜晚先有車，咁唯有放棄啦。

☞ 結果就去咗鳥取站裡面一間食料理嘅餐廳食，裝橫都唔錯，想食咩都有。呢種餐廳其實都好多地方都有，最好係個餐牌全部都係有圖睇，食咩都得。最後食咗條烤魚，燒蠔，蟹粥同埋蝦刺身，仲叫多坏橙汁飲。咁多樣嘢最正係條魚，燒得好香好好食，其他都唔差係條魚特別正 ❕記得埋單都係2300幾円，我覺得可以接受。而且佢哋店員落單每次都係跪喺地下落，初初我覺得好唔好意思，尤其係當我點餐時有猶疑嘅時候，佢哋就係咁跪住等，真係辛苦佢哋。

【慢行鳥取市】

☞ 食完之後我都係行吓頭先鳥取市一啲舖頭同埋街景，自己感受當哋居民或者日本嘅情況，真係比大城市嘅節奏慢，而且街上冇咁多人都舒服啲。當時亦都係放學時間，見到好多學生行路返屋企，有啲就踩住單車返去。

☞ 我自己好鐘意睇呢啲生活，感覺好寫實，好舒服。沿路行去民居生活嘅地方我自己心情都好悠閒放鬆，隨意行入去一啲書店，細型嘅Book-off二手店。

☞ 入夜再返去鳥取站附近嘅商店街，好多去到六七點都收檔，淨返嘅係一啲食嘢舖頭同Daimaru未收。不過間Daimaru都唔係我哋平時喺大阪嗰啲咁大，模式反而似AEON咁，始終鳥取縣係人口之中最少嘅地方嚟。距離七點幾班車仲有啲時間，除咗行商店之外，仲入咗間Cafe坐吓，食件餅等上車，不過當我再㩒列車時間表嗰陣，完來返岡山站嘅下一班車夜晚七點幾係錯，原來之前係我自己唔小心㩒咗查尾班車嘅時間，唔怪得出呢啲奇怪時間啦。不過都唔差嘅，慢行呢個鳥取市其實我自己都好享受，睇得更多真係日本人喺市區嘅生活。

☞ 之後搭鐵路返到廣島都成十點幾，最後食個牛肉飯就算喇。呢日我覺得幾好體驗，可以去到砂丘呢個奇景又可以感受真正日本城市嘅生活節奏。