第14章【一個人制霸全日本都道府縣】広島県：厳島神社 @ 青青一個人制霸日本都道府縣

第14章 : Day5【広島県：厳島神社】2015-03-04 [LEVEL 12/12]

嚴島神社命名為日本三景之一，果然冇錯，真係好值得嚟嘅景點。

自己係一個普通嘅香港打工仔，趁後生三十歲前，自己無咩負擔嘅時候，訂立一個目標去，兩年時間內 (12/2014 - 12/2016) ，分開17次時間，唔識日文情況下，自己一個人遊歷日本47個都道府縣，日後時間都可以令自己回味。

☞ http://ao37182.pixnet.net/blog/post/213131848

☞ FACEBOOK : https://www.facebook.com/chinginjp/

按進入以連結有更多介紹啊❕

值得嚟嘅程度	按進入以連結有更多介紹
Level 10/12	大阪府：難波 / 心斎橋 / 日本橋
Level 10/12	京都府：宇治川
Level 09/12	京都府：大原
Level 11/12	京都府：伏見稲荷
Level 10/12	京都府：鞍馬山
Level 12/12	滋賀県：余呉湖 / 琵琶湖
Level 11/12	京都府：天橋立
Level 07/12	京都府：伊根の舟屋
Level 10/12	京都府：嵐山
Level 10/12	岡山県：岡山後楽園
Level 08/12	島根県：出雲大社
Level 12/12	鳥取県：鳥取砂丘
Level 10/12	山口県：秋芳洞 / 秋吉台
Level 12/12	広島県：厳島神社
LeveL 09/12	山口県：錦帯橋
Level 09/12	香川県：小豆島
Level 10/12	高知県：桂浜

===================

広島県：厳島神社

===================

【出發去宮島】

☞ 去咗三個縣地方，就嚟返個近啲嘅廣島縣地方。搭到宮島口站大約三十分鐘到，出到去行一陣就到個宮島口嘅碼頭，遊人唔算多，見都係本地人同西方嘅外國遊客。由於有張山陽山陰地區鐵路周遊券，所以搭船過去係張Pass包埋，原來架船都係JR公司，唔怪得可以張Pass連埋搭船喇，而且仲係唯一日本JR嘅船嚟添。

☞ 喺隻船上面一面望住廣島市，另一面就望都宮島嘅地方，遠望廣島市真係幾靚。當一駛至見到大鳥居嗰陣好多人即刻朝住嗰邊方向影相。喺個海上面搭咗三個字就到宮島，一到個碼頭見到咁日嘅潮退時間，係15:30，即係呢個時間可以行落去直接去睇個大鳥居，因為依段中午時間都仲係俾水浸住。

【好多鹿@宮島】

☞ 一直行個島就見到好多鹿喺條街度，冇諗過除咗奈良之外原來宮島都有咁多鹿。我係第一次見同近距離睇鹿，覺得好新奇。摸佢好舒服，佢哋完全唔驚人。不過覺得佢哋啲樣唔多Nice，行埋去好似眼超超咁，所以唔覺鹿係好得意嘅動物嚟。

☞ 摸完一陣影咗啲相就閃，因為嚟宮島目的唔係睇鹿，而且今次都有兩個地方想去一個當然就係大鳥居嘅嚴島神社，而另一個係上山頂嘅彌山，所以要爭取時間行。

【著名嘅星鰻】

☞ 去到有一條街係賣手信區，當中都有一啲舖頭食店。差唔多係食晏，而且宮島出名係食星鰻，對於我呢個鰻魚Fans當然要食吓啦。個定食都要成二千幾円，但食落比普通嘅鰻魚飯麻麻，一來啲肉質較散，而且比較薄，食落去質咁冇普通嘅鰻魚實在。

☞ 行冇耐就見到個大鳥居係個開面，基本個位係影相專區嚟，無論外國人定國內人都係咁影。呢日都唔算多人所以影相都唔係咁耐，而且天氣唔錯，非常睛朗，影嘅相特別靚 ❕既然人哋都話三點幾先可以行去睇鳥居，咁就去住另一地方，上去彌山先。

☞ 本來諗住行上去山上，因為書話一個鐘就可以上到山上面，不過望吓時間唔係好夠，而且神社側邊仲有好多景睇，例如五重塔。所以都係搭纜車上去快啲好。

【搭錯回頭車嘅接駁車】

☞ 本來到咗上纜車嘅位置，但根本就唔知自己到咗入口位置。當有架小巴嘅接駁車嚟咗，以為係再帶我上纜車口，但之後坐上去先知車返我落山，即係我起點嘅附近。。。雖然架車唔駛錢，但好戇居 ❕不過先知原來起點附近係有接駁車上，早知就唔行啦，但個站其實好唔明顯嘅。

【宮島上嘅山頂 - 彌山】

☞ 上到山去到獅子岩嘅地方可以眺望瀨戶內海，即係中國山陽同四國之間嘅海，遠望一啲矇矓細小嘅山正係瀨戶內海嘅特色嚟，天上嘅粉藍色加上海上嘅深藍構成多重藍色嘅景像，非常靚。彌山嘅山頂其實仲有一段路向上行先去到，不過我中途就折返冇上到山頂喇，因為時間唔係好夠，放棄咗到彌山嘅山頂。

【好宏偉嘅嚴島神社】

☞ 搭返纜車落嚟，即刻去返睇五重塔，因為我都覺得古舊建築非常靚，行近去五重塔仲覺得有一柱擎天嘅感覺。自己就咗好多角度去影先勉強影出五重塔，真係要揾個好嘅位置同角度影係有啲困難。喺呢度都唔太放咁多時間去睇，要快啲去嚴島神社嘅大鳥居睇，因為潮退時間唔多，同埋冬天天黑嘅時間快。

☞ 去到先俾入場費，都係幾百円。裡面嚴島神社嘅行法有啲似迷宮咁，左轉右轉，不過參觀呢個神社裡面嘅人唔多，係因為好多人已經由神社行出去潮退咗嘅大鳥居影相。不過神社裡面其實有特色，好少個堂嘅設計咁特別。自己影咗一啲相之後就行落去親近返個大鳥居先喇，越行越近就見到個鳥居越嚟越高，連牌面嚴島神社嗰四個字都唔係咁易睇，好多人係個鳥居旁邊根本顯得好細。雖然潮退咗，但係個地上面都有好多水氹，所以行嘅時候都要小心。鳥居嘅後面就係海港嚟，海港隔住嘅地方就係広島市。自己都覺得好神奇潮退嘅時候啲水慢慢流入返海中心，但望返嘅時候啲水會由大鳥居之後開始積聚起嚟，形成一個大海，一切嘅都係幾十步之差。

☞ 前面望嘅鳥居已經好靚，但從後面望過嚟嘅時候，係仲更加靚，而且又冇背光，真係顯得個鳥居非常有氣勢，自己感覺呢邊影個大鳥居更加靚更宏偉。不過要影到背後嘅大鳥居就要諗諗計喇，因為後面其實全部都係啲水浸住，有七，八吋深，而我亦都係走得最出去影相嘅一個嚟。無論邊面影大鳥居，或者係離岸嘅廣島市都非常之靚，自己雖然唔係玩影相，但影出嚟效果都相當滿意。

☞ 潮退逐步消失，企喺啲水上面都感覺啲越嚟越高，開始湧返上嚟。潮退嘅地方好快就俾海水充滿返晒，好彩放棄咗上彌山嘅山頂地方唔係一定唔夠時間影呢個咁靚嘅鳥居。之後就係行返手信區，買啲手信同嘢食，唔知係唔係多人走，每一間舖頭都非常多人。最後我買咗個迷你版嘅鳥居返嚟，都要成千幾円，係有啲貴，但個景咁靚我覺得值嘅。之後咗啲嘢食，旁邊啲鹿仔又行近過嚟身邊，雖然望落好似得意但其實我覺得佢哋都幾煩。要係時候離開宮島，因為尾班船六點半就收，唔係就返唔到広島市，而且自己都想利用夜晚嘅時間周圍買嘢同食嘢 ❕