青青一個人制霸日本都道府縣

【搭JR+北近畿鐵路去天橋立】

☞ 今日轉移去天橋立嘅地方，同埋第一次住溫泉酒店。喺大阪站就揾要搭邊班車去，因為之前都好少喺大阪站呢個大站搭車去一遠嘅地方，所以都揾咗一陣邊個月台先啱。

☞ 似終都要問人喇，就問邊條係去福知山駅，因為JR淨係去福知山駅，之後要再轉北近畿鐵路去天橋立站 。咁上車坐低就開始擔心另一樣嘢，就係幾時落車？因為我唔知由大阪去福知山係有幾遠路程，知係唔近但幾時落車真係唔知，同埋驚瞓著咗過站就大鑊，所以架車一慢駛就即醒要望吓係咩站嚟。

【天橋立 Amanohashidate 咁長嘅英文拼音】

☞ 坐咗到福知山駅大約個幾鐘轉北近畿鐵路繼續去，由於北近畿鐵路唔屬於JR西日本公司，所以JR Pass係用唔到由福知山去天橋立。但係轉車嗰陣就喺月台直接轉車，所以都唔知點買車飛。

☞ 跟住架車開冇耐就有個乘務員逐個走嚟check飛，咁我就喺嗰陣補返去天橋立嘅錢。初初佢用日文問我，我知佢問咩，然後佢再用英文問我去邊。不過，漢字就寫就天橋立，但讀法就真係唔知。天橋立嘅英文拼音係Amanohashidate。嘩，真係記唔到，我諗呢個英文拼音係我去咁多日本地方，數一數二咁長。

☞ 個乘務員問我我都講唔到，要俾返個漢字佢睇先知我去天橋立。咁佢知道之後叫我補返大約千幾円。跟住架列車去到某一個站之後突然向反方向行，原來日本有啲列車路線唔係全部都行同一個方向，都幾得意。

【踩單車@天橋立】

☞ 去到當然揾間酒店喺邊先啦，叫對橋樓，唔係好大間。行去嗰陣旁邊都係景雅一啲好簡樸嘅商店，大多數都係啲賣生活需要嘅用品，完全同大阪市嘅好唔同，其實呢啲先好，體會當地寧靜同簡單嘅生活，好舒服。

☞ 放完行李第一時間就睇有冇單車租，不過呢度就貴啲，要七百円，五點前去對面地方交車。一切就準備好喇，不過個天就唔好，突然落雨嚟。唔理喇，既然嚟咗當然照踩。

☞ 本來先去睇條橋先，係一條當有船經過時會中間自動分開嘅橋，不過去到維修中冇得去，咁踩出天橋立嘅地方啦

☞ 天橋立呢個地方係日本嘅三景之一，其他兩個係喺廣島縣同宮城縣度。佢嘅特別係因為以前地震嘅關係，令到海其中某部份出現一條陸路連到對面地方嘅自然景象。條路嘅右手邊係一個沙灘嚟，面向到宮津灣，但就唔係俾人游水嘅沙灘；而左手邊就係阿蘇海，雖然叫海但都面積比宮津灣細。

☞ 成條路兩邊都種滿樹，係中間一條路開咗嚟俾大家踩同埋行路。沿途嘅人唔多，而有踩單車嘅就得我一個，都正常嘅，落雨邊會有人踩吖。

【傘松公園】

☞ 踩到對面就還車，然後就去搭纜車上去傘松公園度，係上去望整個天橋立嘅景。搭架纜車淨係得我一個，旁邊亦都有吊車坐上去，不過就冇開。上到去望吓天橋立嘅全景，同埋宮津市附近嘅地方。

☞ 旁邊仲有個裡似圈圈嘅物體，個圈都幾大個，放係公園山頭出面，話拎呢錢掟入到個圈就行運，不過個圈圈都有相當嘅距離，感覺好難入，所以都冇玩。

【氣氛寧靜嘅傘松公園餐廳】

☞ 跟住就去咗間餐廳食嘢，不過一個人都冇，仲以為收檔添，不過嗰陣都已經係兩點幾。我就坐喺窗口旁邊嘅位置，望住天橋立嘅自然景，坐得住食飯，真係好舒服。

☞ 餐廳嘅氣氛好寧靜，播放住輕鬆嘅音樂，周圍冇人嘅情況下食嘢，覺得好似拍旅遊節目咁，真係好奢侈。所以不禁自己再叫多一個甜品，繼續享受呢種休閒嘅氣氛。食完就出面再影吓相，睇吓賣手信嘅舖頭。大約四點幾啲舖頭同間餐廳都收檔，咁我就慢慢咁行返去纜車站落返嚟。

☞ 架纜車又係得我一個搭，但同時間我見到啲職員都一齊搭落嚟，之後先知原來嗰一班係最後一班纜車落嚟，真係好好彩，嗰陣係16:30，唔係就要留喺山頭上面喇，依加諗返起都覺得自己太好彩。

【好快天黑@天橋立】

☞ 天好快變黑。咁我就行返頭先嘅地方走，諗住再租架單車返去酒店嗰邊，但去到頭先還車間舖頭話閂門喇，唯有行返去，但係都幾遠路架，不過唯一嘅方法嚟。

☞ 一路行返去，個天好快黑晒，嗰陣應該係五點幾嘅時間嚟。條路完全冇人，係路嘅兩旁有啲燈引路返去，唔係根本兩邊嘅地方係勁黑，樹林嗰度係絕對見唔到。

☞ 一路行只係聽到兩邊嘅海浪聲，喺嗰陣個氣氛都幾驚㗎，得自己一個心都有啲寒寒地。當時真係諗好在呢度係日本，如果其他地方我應該俾人捉走咗喇。不過啲海浪聲真係令人越行越驚，所以中途都聽住歌嚟行，感覺好啲啦。

☞ 一路行其實都唔知地方啲水氹同啲泥係喺邊，因為剛才落雨令到地下好多水氹，真係會踩中落去，不都唔理最緊要快啲返去酒店先。大約九個字到就行到返酒店，附近已經收晒，連神社都冇晒人，條街勁黑，冇晒嘢睇，望一望個錶係六點半，即香港係五點半。嗰陣真係覺得不可思義，好似感覺去到九點幾嘅時候，咁既然冇嘢睇冇嘢行就返返去酒店喇。

【酒店服務好細心@對橋樓】

☞ 返入去酒店去個服務員先叫我坐低，無論櫈同檯都係用木做，仲做到好古舊，好有懷舊味道。然後其仲一個女服務員就跪喺地下，然後端出一杯熱茶同糯米糍般嘅點心俾我食先，好細心呀。

☞ 之後慢慢填啲入住資料，再問我夜晚幾食，7:00定7:30？咁我話七點鐘，反正都冇嘢做。之後就叫我除鞋換拖鞋，不過佢張我對靴放入一個專放鞋櫃嘅地方。嗰陣諗係唔係唔俾我再出去，要我所有時間都要喺間房裡面？

☞ 上樓入到間房係和式嘅榻榻米，除咗房門其他都係拉門嘅，而且瞓覺都係打地舖。第一時間就係換咗套和服先啦，第一次著有啲唔慣。我係一路跟住佢嘅步驟嚟著，唔知點解都好似好鬆，同埋基本我裡面淨返條底褲著住，感覺都有啲怪怪地，好驚佢甩出嚟。

【瞓到唔知食飯】

☞ 之後開咗電視嚟睇，咁啱就播緊香港佔中嘅情況，原來呢單嘢真係國際新聞嚟，仲訪問當時香港人添。個節目係類似時事分析嘅節目嚟，但係我睇多陣就瞓著咗。

☞ 突然，有電話打俾我，突然醒晒。原來係通知我落去食飯，不過我唔係好聽得清楚，加上有啲唔清醒，唔知點解會咁嘅情況下再瞓過。結果之後有人㩒門鐘嚟，真係揾上門。個職員就話叫我依加落去食飯，跟住我就話OK，睇返個時間原來係七點三喇，因為我約咗七點食飯，我嗰陣先知咩事，原來自己遲晒，真係唔好意思。

☞ 嗰陣我即刻衝落去飯堂食嘢，就連門都冇鎖好，結果有另一個職員帶返我入返房話我冇鎖好對門出嚟係好危險，並叫我一定記得鎖好先出嚟。唉，搞到真係好唔好意思，又遲食又冇鎖門。

【好享受一個人慢慢食飯】

☞ 去到食堂見到一對男女一齊之外就淨返我一個食。咁我就坐另一邊，係完全同佢哋分開，感覺都幾正，好似呢個空間依加就屬於係我一個人享受。佢上嘅嘢食係類似懷石料理，樣樣嘢都係好細份，同埋食完一樣先會有另一樣上嚟，而且速度都比較慢，係我咁肚餓嘅情況真係好想啲嘢食嚟得快啲，不過呢啲地方係慢慢上。

☞ 準備食嘅時候都有一個女侍應走埋嚟，介紹依加準備食嘅係咩嚟。因為佢唔識英文，淨同我講日文，而我又唔識日文根本唔知佢講咩，所以佢都準備咗張咭，係用英文寫嘅咭介紹今餐有咩食，而每上一次菜都準備唔同嘅咭去介紹，好細心呀，而且啲咭仲係有公仔添，好鬼得意。呢啲真係日本人最令人值得欣賞嘅價值，其他嘅一定做唔到。啲嘢食我就覺得OK，但唔可以話非常好食。

☞ 大約食咗一個鐘到就食晒，然後就走返去上樓沖涼休息。之後再睇吓電視咁，但太攰個人好快九點幾就瞓著。

----------
對橋樓
----------

☞ 交通 : 乘坐北近畿鐵路至天橋立駅下車，步行3分鐘。
☞ 網址 : http://www.taikyourou.com/

-------------
傘松公園
-------------

☞ 纜車 :
毎小時0分 15分 30分 45分出發 (4分鐘到達)
時刻表 : 8:00 - 17:30 [16:30 ( 1月･2月･12月) / 17:00 (3月･11月) / 18:00 (7月20 - 8月20)
費用 : 單程330円
網址 : http://www.amano-hashidate.com/043footwork.html#time

‎☞ 観光船: 天橋立桟橋⇔一の宮桟橋
費用 : 單程530円，往返960円
時刻表 : http://www.amano-hashidate.com/images/pdf/kouro2012_10.pdf

☞ 傘松公園網址 : http://www.amano-hashidate.com/030kasamatu.html

前往天橋立可以使用以下由JR西日本推出嘅【 JR關西廣域鐵路周遊券】，可以於購買後選擇任何一日開始連續五日使用來往天橋立，以及全關西地區 。更可以使用山陽新幹線前往姫路，神戸，岡山，大阪地區。

由大阪前往天橋立也要4,110円，但持有【JR關西廣域鐵路周遊券】更可以乘搭其他關西地區的JR特急列車前往兵庫縣，京都府，大阪府，和歌山縣，奈良縣，滋賀縣，岡山縣，鳥取縣以及香川縣及關西國際機場。著名景點包括鳥取砂丘，岡山後楽園，城崎温泉，環球影城，嵯峨嵐山，天橋立，白浜，奈良公園，琵琶湖国定公園等。

亦都可以乘搭包括部份地區巴士路線和部份私營鐵路。

【JR關西廣域鐵路周遊券】官方網頁：https://www.westjr.co.jp/global/tc/ticket/pass/kansai_wide/