青青一個人制霸日本都道府縣

第10章 Day1【岡山県：岡山後楽園】2015-02-28  [值得嚟嘅程度  LEVEL 10/12]

自己係一個普通嘅香港打工仔，趁後生三十歲前，自己無咩負擔嘅時候，訂立一個目標去，兩年時間內 (12/2014 - 12/2016) ，分開17次時間，唔識日文情況下，自己一個人遊歷日本47個道道府縣，日後時間都可以令自己回味。

 ☞ http://ao37182.pixnet.net/blog/post/213131848

【認識日本山陰，山陽】

☞ 喺十二月嘅去完九日嘅Kansai Wonder Quest，令我大開眼界，體驗到一個人喺日本嘅心情。

☞ 某一日喺香港望返有關關西地方嘅書，回味吓之前去嘅地方同埋書有冇出入。咁啱有一本書寫住山陰山陽嘅地方，初初仲諗後唔係啲大陸地方。 一揭本書，原來係介紹日本，但未聽過呢個地方，而且都冇一個地方我認識，直到呢個地方名一出現，廣島。但其實都仲未知廣島同埋山陰山陽係日本嘅邊度嚟。認識廣島係歷史書二次大戰見到，但佢嘅真係樣貌係點真係唔知，好有神秘感想了解多啲。

☞ 而且書裡面其他縣都好吸引，例如鳥取砂丘，秋芳洞都好得意，所以諗諗吓不如一個人再日本，睇驗一次從未去過嘅地方睇吓。一次六日嘅日本中國地方，Chugoku Wonder Quest就咁誕生啦。

【日本有個地方叫中國 ?】

☞ 日本都有個地方叫中國，係關西嘅西邊同四國嘅上面，亦都係山陰同山陽嘅地方。山陰地方就指鳥取縣同島根縣地方；而山陽就指岡山縣，廣島縣同山口縣嘅地方，中國嘅地方包括咗五個縣，鳥取縣，岡山縣，島根縣，廣島縣同山口縣。

[Captured from Yahoo JAPAN]

☞ 今次去呢度從未去過嘅地方都小心啲去計劃，尤其啲鄉郊地方，搭嘅巴士真係要認真睇清楚，唔係就好似上次去咁等個幾鐘車。今次都係由大阪搭樂桃航空，然後再搭新幹線去中國地方❕

【酒店住岡山定廣島】

☞ 訂酒店五晚都係同一間搞掂，亦都冇諗要住溫泉酒店。初初一開始訂咗岡山市嘅酒店，因為JR岡山站可以話係一個前往去山陰同山陽嘅重要轉線站，亦同時去四國嘅重要嘅轉線站。

☞ 雖然住岡山市係方便，但發覺附近夜晚嘅商店街好似冇咩舖頭可以行街，同埋好早收檔，所以之後決定都係取消，改咗去廣島市住五日。雖然要去其他景點多咗三十五分鐘嘅時間搭山陽新幹線去返岡山站，但起碼夜晚廣島市係熱鬧多人，所以就決定五日住晒廣島市。

【超值嘅山陰山陽地區鐵路周遊券】

☞ 去到大阪關西機場買咗張Kansai Area Pass for 1 day，原因係3月1號JR West公司出一張更超值嘅Pass係專去中國嘅地方，山陰山陽地區鐵路周遊券。所以2月28號呢日我唯有自費搭車由姬路站去岡山站。而由關西機場去姬路站就用Kansai Area Pass for 1 day。

☞ 因為張Kansai Area Pass唔包新幹線路段，所以我搭嘅全部最快多係特急列車。雖然搭咗好耐，但由神戶搭去姬路嘅時候都欣賞到沿海嘅景色，其實都唔錯嘅。

【出發去岡山】

☞ 去到姬路站就落車，都十二點幾，所以索性食嘢先。食完之後就要俾錢搭新幹線由姬路站去岡山站。 一上到新幹線，正呀，好舒服呀。剛才嗰啲列車啲櫈坐得唔舒服，加上又眼瞓，其實都好想瞌瞌，結果一上到新幹線嘅時候就係咁瞓到去岡山站，而且真係好快，坐新幹線感覺好正。

☞ 去到岡山站，覺得好新鮮，因為第一次去一個未去過嘅車站，而且連實質嘅位置都唔係太清楚，係開始進入Chugoku Wonder Quest嘅旅程。個岡山站好大，因為包括咗幾條在來線，即係普通列車嘅線，同埋山陽新幹線。同埋車站都多人轉車，雖然密集程度點都唔夠京都站同新大阪站咁利害，但都係一個好大同好繁忙嘅車站。 車站出面亦都好多商場舖頭連埋一齊，我諗應該係好多大型車站佢哋啲格局都會似係咁樣有好多舖頭同埋一個大型商場裡面。

☞ 咁我第一個行程就係去岡山後樂園，但同時間我亦都要處理咗我個行李先。因為自己住廣島市，冇理由去完廣島再返轉頭去岡山。一來嘥時間，二來冇Pass太貴喇，來回都要坐新幹線就會冇咗一万円。所以就揾日本一啲叫coin locker嘅嘢，係專俾人放低啲行李，基本日本大部份車站都會有。

☞ 途中見到一個counter係專幫人睇住啲行李，我就唔理咁多叫佢幫我睇住個行李，而收費係七百円。寄存之後一身鬆晒，依加就可以一身輕去岡山後樂園。

【日本三名園之一 @岡山後樂園】

☞ 一路行去岡山後樂園都只係25分鐘左右就到，唔算好遠。一路行去沿住大馬路行，感覺好舒服，比喺大阪市同京都市相對唔算好多人，好清淨，感覺喺呢度慢行係非常寫意。行過岡山市嘅商店街，果然真係冇咩舖頭開咗檔，但當時只係兩點時間，真係奇怪，好在我冇喺岡山市住酒店。

[Captured from Yahoo JAPAN]

☞ 無論邊條街行落都好舒服，好寧靜，真係好鐘意呢啲環境。行多真冇耐就見到岡山後樂園條橋，要過一條河咁就入去後樂園。

☞ 入到去岡山後樂園，真係好大好靚，好似呢個後樂園係古時一啲貴族整嘅類似後花園嘅嘢嚟。裡面佔地都幾大，應該都有兩，三個足球場咁大。裡面好靚，雖然係人工整出嚟，但係都令人嘆為觀止。佢裡面嘅景每一度都係好細心，所以每一個位每一個角度影出嚟都係好靚，加上天氣好好，令自己不停係咁影相。

☞ 最特別我覺得啲路徑，係好隨意去排，但會感覺出一種自然嘅美，隨心去感受後樂園嘅風景，實在太舒服喇。後樂園其中一個地方係種咗好多粉紅色嘅樹，望落去有種櫻花嘅春天溫暖感覺，而旁邊有好多專業嘅相機友不斷係咁影啲花。中途去到間裡似茶寮嘅地方，不過其實咩都有得買，例如紀念品。

☞ 自己就買咗杯雪糕，坐係出面啲長櫈上面，一路慢慢食雪糕，一路望住咁靚嘅景象，個腦完全係停止唔諗嘢，實在係好寫意。遊整個後樂園都用咗兩個鐘左右就走，本來隔離有個岡山城，不過時間唔夠所以冇去到。走嗰陣就試下坐佢當地嘅路面鐵路，係我第一次喺日本坐。其實冇咩特別，係嘗試過癮啫。

【出發去廣島】

☞ 返到去岡山站就拎返個行李，然後就再俾錢搭新幹線去廣島站。呢程新幹線大約三十五分鐘，但車票係五千幾円，好貴呀 ❕所以冇JR Pass旁身真係差好遠。好快去到廣島站，同岡山站比廣島站仲多人，而車站出面都好繁忙，見到好多放工放學行嚟行去。

☞ 嚟到廣島第一時間當然係要check in，放低件行李先。不過間酒店唔係喺廣島站附近，係要搭路面鐵路先去到間酒店。不過路面鐵路嘅廣島站都幾多人，加上我又要拎住個大喼，其實都幾唔放便，啲電車其實都幾窄，裡面人又多真係有啲麻煩。

【廣島原爆遺址】

☞ 一check-in完拎行李上房就即刻出去，去原爆遺址嘅地方，加上已經係四點幾，驚好快就天黑，所以動作一定要快 ❕急急腳上架電車，喺原爆遺址個車站落車，都要十幾分鐘先到。喺架電車裡面我其實都幾緊張，因為我唔知邊個站係原爆遺址，車裡面太多人喇，根本好難睇。不過，總算都落到車，然後即刻揾原爆遺址嘅地方，好彩都好近。

☞ 其實個原爆遺址都係一個公園嚟，周邊都唔係有好多特別嘅嘢喺度，最觸目都係個原爆炸剩嘅館，前身係農產獎勵館嚟。當時原子彈炸淨返呢個建築物，而依加個建築物仍保持屹立不倒，所以成為廣島原爆代表建築物，亦都成為世界文化遺產。

☞ 去到就好易揾到個建築物，周圍都有講以前二次大戰嘅情況同埋有關廣島嘅歷史。雖然好多都係我唔識嘅日文，但自己都不斷係咁睇。我去到咁啱個建築物修輯緊，所以搭晒啲棚架喺度。望到座嘢真係幾殘，可以想像原爆一刻嗰一吓幾威力係幾咁強大，有幾震撼。另一邊平和紀念公園，擺咗好多藝術雕刻，向世人宣傳和平，亦都有一個點著火燄嘅地方，追悼因原爆喪生嘅人民。而周邊亦放咗好多彩絲帶，希望世界和平。

☞  整個廣場都好大，但氣氛都比較寧靜，唔知係唔去到大家都有所反思，而自己都覺得現場有一遍嘅沉默同哀愁，我諗當喺現場嘅時候都會感受戰後帶嚟悲慘情感。本來旁邊嘅原爆和平記念館都想去，但間嘢五點就收檔結果冇得去睇。喺個公園行多都離開喇，其實嘢就唔多嘢睇，不過都值得嚟感受一吓。而且呢度都吸引咗好多外國人嚟睇，尤其係西方國家，可能佢哋都對原爆遺址有興趣，事關呢一件都係國際性嘅歷史嚟。

【好熱鬧@廣島市】

☞ 開始入夜，都六點喇，離開嘅時候唔係去返商店街。呢個商店街好繁華，雖然比心齋橋都唔算係好熱鬧，但好過喺岡山市，起碼都有Sogo，Uniqlo呢啲連鎖商場同店舖。

☞ 我開始入間大型Book-off，係Super Bazzar嚟。Book-off係日本係出名嘅賣二手貨物嘅商舖，以舊書同Cd /DVD為主。無論咩主題同類型飛書都有，所以我一直覺得Book-off完全滿足我購物意欲，只要對貨物嘅要求唔高，非常啱晒我。喺裡面通常我自己都係睇打機嘅攻略書同一啲舊Games，因為好多都保持得好好所以有時買返嚟嘅攻略書同碟就會收藏，特別最我嘅Street Fighter系列，我諗自己都買咗好多碟同攻略書，十幾廿本都有，但甚少去睇，但作為收藏其他都幾正。

【好食廣島蠔 + 廣島鐵阪燒】

☞ 夜晚食嘢就行商店街嘅本町揾，都好多食嘢嘅舖頭。嚟廣島緊係要食出名嘅廣島蠔同廣島燒，不過我就冇揾定邊間食，都係行到邊食到邊。咁入咗其中一間有廣島燒食嘅舖頭，入到裡面都唔少人去食。咁我坐係Bar檯嗰邊，面對住鐵阪燒嘅位置，叫咗個廣島燒同埋廣島燒蠔，再加杯橙汁。個廚師即刻喺長型嘅，鐵板面前整個廣島燒，拎起一堆面燒，再落啲蛋落去，不過見佢都打咗幾隻蛋落去整。一路燒一路落啲生菜，魷魚，蝦仁落去一齊整，然後反轉再反轉，燒到差唔多熟再放啲蔥同醬汁再燒燒佢就可以食。一路燒嘅過程都好香，真係好想快啲食到。

☞ 另外嘅廣島蠔雖然細細隻但好好食，燒蠔燒得好香，食落啲蠔嘅鮮味仍然保存，我覺得唔錯，係香港應該未食過呢種咁香嘅燒蠔，但唔係話香港嗰啲冇廣島燒蠔咁好食，應該係各有各風味，唔錯。個廣島燒都好食，不過太大喇，真係食到好飽，食到中途我真係有啲唔想食，但唔食就太嘥啦，唯有慢慢咁食。我自己覺得廣島燒好食過大阪燒好多。

☞ 食到好飽，最後都連電車都唔搭行返酒店消化吓。

資料

------------------------------------

山陰山陽地區鐵路周遊券
------------------------------------

簡介

☞ 山陰山陽地區鐵路周遊券係JR西日本公司發行，可以喺連續7日嘅時間無限次任搭關西地區 (京都市，奈良市，和歌山市，大阪府，關西機場，神戶市)，以及山陰山陽地區 (鳥取縣，岡山縣，島根縣，廣島縣同山口縣)嘅JR鐵路，仲有北九州部份指定新幹線車站 (小倉站及博多站) &  四國 由 宇多津到高松  。

[captured from JR West]

☞ 利用山陰山陽地區鐵路周遊券可以乘坐所有非指定席嘅特急列車，非指定席嘅山陽新幹線同普通列車。

☞ 任何型號嘅新幹線列車都可以乘搭，只限山陽新幹線所營運嘅博多至新大阪路段，而新大阪站至京都站 / 名古屋站嘅新幹線路段需要重新買車票乘搭。

票價

• 19,000円 (網上訂)
• 20,000円 (當場買)

換取周遊券地點 :

可以喺京都站、新大阪站、大阪站、三之宮站、關西機場站、奈良站、和歌山站、岡山站、境港站、米子站、鳥取站、松江站、廣島站、新下關站、下關站、小倉站、博多站 換取 / 購買周遊券。

網址 : https://www.westjr.co.jp/global/tc/ticket/pass/sanyo_sanin/

-------------------

岡山後樂園

-------------------

☞ 參觀費用 :

• 400円 ( 兒童: 140円)

☞ 營業時間 :

• 3月20日～9月30日 　7:30a.m - 6:00p.m.
• 10月1日～3月19日 　8:00a.m - 5:00p.m.

☞ 交通 :

• JR岡山駅步行 25 分鐘
• JR岡山駅前往巴士車站第 1 乘車處，搭乘前往「藤原團地」巴士，「後樂園前」駅下車 。

☞ 網址 : http://www.okayama-korakuen.jp/

前往岡山市交通介紹