青青一個人制霸日本都道府縣

===================

京都府：伊根の舟屋

===================

☞ 今日朝早瞓醒就七點起身，然後食個和式嘅早餐，不過今次係全部嘢一次過，一大堆東西上晒嚟。反而我鐘意係食燒魚，好好味呀 ❕ 之後我就check-out先，執晒所有嘢就再出去玩喇。

【飛龍觀展望@天橋立】

☞ 尋日就去咗傘松公園嗰邊嘅天橋立山，今日就去返另一邊嘅天橋立，飛龍觀展望，其實距離酒店行十分鐘就上到去，非常近。去到就坐啲吊車上去，係得張櫈坐上去然後吊上去上面坐，雖然都唔係好高，而且望地下距離唔係好深，不過第一次坐都總係有啲驚驚哋。

☞ 上到去其實係一個公園嚟，好多嘢玩。我嗰陣係九點幾到，應該唔算早，不過就係冇人。喺嗰度望過去天橋立幾靚，同由傘松公園嗰邊望完全唔同，呢邊望去嘅天橋立係一個鋸齒型，由傘松公園望係一條直線。

【彎低條腰由大脾內側倒頭望天橋立】

☞ 去到最高點地方就有個觀景臺，對望係天橋立嘅全景嚟，旁邊仲有個台可以企上去，背住天橋立然後彎低條腰由大脾內側中間位置倒頭望，話咁樣可以睇到天橋立好似一條飛龍向上天。當然我就睇唔到喇，唔知關唔關天氣唔好，嗰日天氣都係陰天多雲，可能就咁睇唔到條龍飛上天啦 ❕影咗一陣就走，然後落返地下，準備搭巴士去另一個地方，伊根之舟屋。

【搭巴士去伊根之舟屋】

☞ 去到巴士站其實都有啲迷網，因為唔識睇個時間表 。個時間表非常簡單，得個時間表，即幾時幾分，但冇寫中途站或者，幾錢全部都冇。不過係見到書上面話路線5，7，8同9號就啱，所以我諗邊一架嚟都OK。好好彩我等咗一兩個字就有車，其實真係好彩，因為呢啲路線係一個鐘一班車。

☞ 上咗巴士拎張乘車券就坐低，一路搭到去伊根之舟屋。沿途架巴士得兩三個人坐，非常少。架巴士大部份地方都係民居嘅地方嚟，所以都唔知自己去咗邊，淨係知架巴士係咁兜嚟兜去。自己都發覺搭咗好耐，有成個鐘，心諗點解仲未到個站，而且附近嘅地方又唔知係咩，諗緊自己係唔係搭錯巴士，所以一路嘅心情都有啲緊張。真係成個鐘到，終於見到個站然後落車。

【坐觀光船遊伊根灣】

☞ 一落車發覺其實冇咩嘢見到，都係啲樓房，同埋一啲冇開門嘅舖頭。本來睇書話呢度係有單車踩，一路踩一路感受伊根灣漁港嘅風氣，不過眼前就咩到冇，人又冇商店都冇，淨係得個觀光船嘅買飛地方。冇計，唯有坐觀光船遊一個伊根灣。

☞ 伊根灣係一個漁港嚟，類似香港嘅大澳咁。佢哋啲屋地下嗰層係放隻出海嘅快艇或者啲小型嘅船嘅地方嚟，而上面個層先係用嚟住。而且佢啲屋全部都係喺沿岸嚟起，我諗呢個係呢度伊根灣嘅特色嚟。可能香港自己去過大澳望過呢啲，唔太覺得有啲咩得意。當隻遊覽船離開。

☞ 架觀光船仲有即時嘅卡樂B蝦條賣，一包一百円，用嚟係餵周邊飛緊嘅海鷗。當佢見你將蝦條掟出去啲海鷗就飛過嚟食，而且仲要係好準咁食到，未事過失敗，真係幾勁 ❕當掟出去就吸引勁多隻海鷗喺度徘徊我身邊，但佢哋又唔會搶嚟食，所以都幾得意幾好玩。

【伊根浦公園】

☞ 大約半個鐘船程就完，好似連唯一可以玩嘅嘢都完咗，咁既然有時間就闖吓究竟伊根之舟屋有啲咩喺度，唔信間全部都收晒檔，但事實真係全部都冇開。之後行到去碼頭附近，算係有一個伊根浦公園影吓相咁，但唔覺得好特別。去到冇幾耐就落雨，啲雨時大時細，有時冇雨添。所以都都係逗留一陣就閃，而且望過地圖，附近真係再冇嘢行喇。

【下一班要一個半鐘先有車 ❕ ❕ ❕】

☞ 回程嘅時候，揾返個巴士站，但睇到個時間表，啱啱就走咗一班，而下一班要一個半鐘先有車 ❕ ❕ ❕初初我真係唔信，我諗係我自己睇錯，但睇嚟睇去下一架九十分鐘開嘅事嚟，跟住周圍都冇嘢，想揾間食嘢同買嘢嘅都冇，而且又冇瓦遮頭，把遮留咗喺喼裡，所以只有呆企喺度。

☞ 不過諗應該可以接架的士車我，咁我就落住雨行返剛才賣觀光船飛嘅地方，叫個職員幫我call的士，但係個職員話係要嚟之前call定。唯有等一個半鐘車嚟，係條街，係好在間嘢出面係有瓦遮頭同有得坐低等巴士，不過一直落住雨加上有風，吹落個人真係好凍，自己都打冷震，就算帶晒甚麼手套個身都好凍呀 ❕好彩之後停咗雨，但都仲有好耐先有車，都唔知做咩好，唯有聽住歌等，一路喺出面有啲水氹嘅地方玩下水，聽落都好似好慘咁。

【一萬円搭巴士 ❕ ❕ ❕】

☞ 等咁耐終於有巴士喇，上到去坐低好舒服，至少冇咁凍先啦。不過沿途就發現，銀包最少嘅面值係一萬円，同得啲百幾円幾碎銀。咁啱車上有啲放學嘅中學生，雖然應該都知冇可能換到錢。一萬円喎，即係香港七百蚊，自己喺香港拎張五百蚊紙都冇邊個可以同我打散喇，可況中學生身上會有幾多錢呢，不過危急情況咩都要試。問咗幾個學生哥結果都係冇，都唯有打定輸數俾張一萬円搭呢程巴士。除咗冇散子呢個問題之外，突然又諗究竟邊個站落車先啱呢。

☞ 初初就話有四條巴士線會去伊根之舟屋，但回程一來我唔知坐咩路線，二來就算去天橋立都未必係剛才上車位置嚟，所以即時個人著晒，勁留意周邊啲地方係點樣，要去到天橋立附近就要落車。咁架巴士當去到尋日傘松公園附近嘅時候我就即落車，雖然唔知架車會唔會去天橋立酒店附近，但起碼我由呢度傘松公園有路行去酒店先。咁準備落車嗰陣同司機講我得一萬円，唯有俾落去，不過個司機就話No，No，叫我唔好張一萬円放落去，反而問我有幾多碎銀，我拎晒出嚟得百幾円，佢就話百幾円啦，然後叫我落車，真係好多謝佢，我諗香港搭巴士話知你就算一千蚊照放都冇問題。

【急步離開天橋立】

☞ 巴士問題就解決咗，而我一落車就急步行返去酒店度。經條天橋立行返去要成四五個字時間，但都要行，同埋勁急步行返去，中途冇停過亦都冇望過任何嘢，只係一嘢行去酒店拎喼走人，因為覺得呢度啲交通勁疏，同京都市大阪市完全兩回事，所以一到酒店，拎埋個喼就即離開去車站，搭最快嚟班車返大阪，因為真係驚再冇車返去大阪就唔知點算，雖然嗰陣五點幾，正路應該仲有幾班列車嘅。

☞ 我一上到列車坐低，感覺真係好開心，冇晒緊張嗰種心情，慢慢坐低唞吓氣，好舒服。去到大阪已經夜晚，即刻check-in放低行李去食嘢，因為由早餐到夜晚都冇食過嘢。所以食完一餐唔夠飽再整多個吉野家 ❕

------------------
飛龍觀展望
------------------

☞ 營業時間 : 
２月２１日～７月２０日 ９：００～１７：００
7月２１日～８月２０日 ８：３０～１８：００
８月２１日～１０月２０日 ９：００～１７：００
１０月２１日～２月２０日 ９：００～１６：３０
☞ 參觀費用:850円
☞ 網址 : http://www.viewland.jp/tw/hiryukan/

------------------------------------------------------------------------------------------------
 丹後海陸交通 路線バス (天橋立駅 < > 伊根湾めぐり・日出)
------------------------------------------------------------------------------------------------

☞ 費用 : 400円
☞ 網址 :http://www.tankai.jp/rosen_img/16_4_8_kanko_jikoku.pdf

----------------------------------
伊根湾めぐり遊覧船介
----------------------------------

☞ 營業時間 :09:00 - 16:00 
☞ 參觀費用:680円
☞ 網址 :http://www.inewan.com/02yuransen.html