【East JP Wonder Quest – Day1】2015-09-26 [值得嚟嘅程度 LEVEL 10/12]
去完三次兩日制嘅日本遊，事隔一個月之後再去日本，不過就為期六日時間，由2015年9月26日到10月份一，以關東同東北為主，命為EAST JP WONDER QUEST。
期待好耐嘅東日本旅程
因為之前冇假所以逼住去兩日制嘅日本遊，當有番年假嘅時候，終於可以唔駛咁趕兩日後即刻要返嚟。目前嗰一刻，都已經去咗17個縣，嚟緊呢次會制霸六個縣，即係每一日一個縣，其實行程都相當緊湊。但等咗咁耐可以去個長啲嘅旅行都非常興奮，而且仲係去啲從未踏足過嘅東北地區。
繼續凌晨機出發
首先飛到羽田機場再轉搭列車去到上野，然後搵奏店寄放行李先。之後就出發去第一個行程，去神奈川縣嘅箱根山。
首先去JR上野站換張JR EAST PASS先，因為今次行程都比較遠，每日唔係要搭新幹線就係要搭特急列車去。有呢張PASS就真係慳勁多錢。
去箱根山要轉可多次鐵路
換完張PASS出發去箱根山，首先去搭JR到品川站，然後搭個特急列車去JR小田原站。之後要轉搭箱根登山鐵道，由於呢程車開始直到上箱根山為止都係箱根登山鐵道都係箱根登山鐵道營運，所以將JR EAST PASS就唔用得，要每程買飛俾錢。
首先由小田原站出發去箱根湯本站，然後再轉乘另一架列車由箱根湯本站去強羅站，然後再轉纜車由強羅站去到早雲站先到達前往大涌谷嘅地方。坐咗都有成個幾鐘先到，而且每一程要轉嘅列車都係逐次俾錢。感覺上好似係咁俾錢搭車，不過後來先發現原來去箱根根山係有一日乘車券。
雕刻之森美術館
出發搭箱根登山鐵路，由箱根湯本站去雕刻之森站。架列車都好多人，甚至係要企位，好彩自己都有位坐。由呢段鐵路開始架列車就會係山上面行，列車會開始慢慢傾斜上去。列車並唔係一直線行上山，係當去到某啲地方，順應個山路，列車會改變行車方向，覺得好有趣呀。即係列席會之字形向山上行駛。
去箱根山之前去咗雕刻之森美術館，嗰度擺放咗好多唔同類型嘅，而且每件作品都係比較大型，都好值得睇，好多邊都用咗好多心思製造作品，非常細膩。加上整個美術館大部份都係室外，喺戶外欣賞作品感覺非常輕鬆，好少可以搵到藝術品放置係露天嘅地方。
繼續向箱根山出發
睇完繼續搭同一架列車去，去到強羅總站落車。然後再去買車飛搭纜車上去。嗰刻覺得自己不斷係咁搭車上去，已仲未上到去山上面。強羅站出面都有啲舖頭仔買紀念品，不過我都未去睇景點，買紀念品有啲奇怪。
坐纜車上去大約十幾分鐘就去到，上到早雲山站。由山上望去都幾靚，不過可惜係多雲陰天。
大涌谷封咗冇得去
理應可以由早雲山站坐吊車去著名嘅大涌谷地獄溫泉區，係充滿由溫泉地上噴出嚟嘅煙同埋硫黃，係非常值得去睇。不過，好到啲職員同我講因為大涌谷出現有爆發機會嘅活躍情況，所以大涌谷封咗冇得去，連吊車都停駛要靠搭巴士，行山路繞過大涌谷去另一個景點，蘆之湖。
坐船遊覽蘆之湖
巴士帶我去到蘆之湖邊，然後坐上觀光船，有三層高，中間仲有得敲鐘玩，據稱係戀愛嘅敲鐘嚟。架船身處蘆之湖上面，經過高爾夫球場，箱根神社，然後嚟到箱根町港。如果有需要落船可以喺呢度落去附近嘅酒店，唔係隻船就繼續去到芦ノ湖遊覧船乗り場落船。
整個遊船河嘅旅程都係半個鐘左右，自己喺船上面感受船上面嘅海風，加上乘客唔多，都幾舒服。當隻船行到某啲地方就會廣播介紹嗰啲地方嘅特點，例如箱根神社元宮，箱根神社等，隨咗日文仲有英文，所以都明佢講咩。
最後我就喺芦ノ湖遊覧船乗り場落船，不過發覺我落船嘅地方唔係上船嘅地方，有啲驚驚地，因為自己唔知係唔係身處令另一個島，而且之前無計劃得咁詳細自己落船會係邊度，而且其他落船嘅人可能喺呢附近租酒店住一晚。嗰刻擔心自己返唔到酒店，而且嗰陣都五點幾，心情有啲著急。
好彩轉個頭就見到有個巴士站，而且係返去箱根湯本嘅方向，即時定啲。
巴士到達箱根湯本都成七點，附近嘅舖頭仲未閂就去行吓，大部份都係賣手信同食店，而且都幾多人。之後買咗啲手信坐登山鐵路返去小田原站，再轉車去番橫濱。
欣賞橫濱港夜景
夜晚去咗橫濱市食嘢，之後去咗橫濱港睇夜景。嗰度有一個好大嘅地方，設計得好有藝術，行上去有啲地方係斜，但有啲平得嚟又啲拱型，好難形容得好。加上藍色燈光柔和效果，氣氛非常浪漫。
後記：
箱根係一個好靚嘅地方，亦都係富士箱根伊豆國立公園其中一部份，所以保留咗好多自然景觀，又有天然溫泉。如果要玩晒整個箱根山嘅地方最好住一晚溫泉旅館，用兩日時間盡享箱根各種自然景。
前往箱根可以使用【 箱根周遊券 】，可以探索所有箱根地區最重要的景點，包括剛才提及的地方芦ノ湖，箱根山，雕刻之森美術館等等。以一張周遊券無限次乘坐指定巴士，列車，吊車，登山纜車和海賊觀光船。
遊覽箱根全程一般要要6,530円，但持有【箱根周遊券 】只需要5,140円。
自己係一個普通嘅香港打工仔，趁後生三十歲前，自己無咩負擔嘅時候，訂立一個目標去，兩年時間內 (12/2014 – 12/2016) ，分開17次時間，唔識日文情況下，自己一個人遊歷日本47個都道府縣。
留言列表
