第25章【一個人制霸日本47個都道府県】(関東) 栃木県：戦場ヶ原－青青一個人制霸日本都道府縣

【Kanto Travel Focus 2 – Day2】2015-08-16 [值得嚟嘅程度 LEVEL 14/15]

【出發去戦場ヶ原】

☞ 上一次旅程本來去戦場ヶ原，不過瞓晏咗所以就冇去到喇。今次有機會一定要去。

☞ 今次起到身，食過吉野家鰻魚飯做早餐就去搭JR日光線，再去日光站落車轉巴士去戦場ヶ原。等巴士都幾多人，因為我要搭班車亦都係好多遊客去東照宮必搭嘅巴士嚟。雖然十分鐘一班，但對日本巴士其實已經係好密。

☞ 巴士去到東照宮通常就有好多人落車，而我同其他乘客都係前往更深入嘅郊區地方，奧日光。

☞ 巴士去竜頭の滝呢個站落車，落嘅得幾個人，應該都係出發去戦場ヶ原。

【第一個景點：竜頭の滝】

☞ 戦場ヶ原係日本其中一個國立公園嘅位置嚟，當中嘅地方都受日本國家保護，盡量要保持當地本身嘅自然環境。因為咁呢啲地方唔似旅遊區，有食店，有廁所，有舖頭等等。我自己都覺得應該裡面係冇廁所，落車第一時間即去廁所，無論急唔急都好，第二就係買定嘢飲，裡面肯定唔會無啦啦有野飲賣，點都準備好穩陣。

☞ 搞點就跟指示出發，行到冇耐就有個地方叫竜頭の滝，係一瀑布嚟，雖然唔係好大，行近都好有氣勢。

【熊出沒注意】

☞ 影咗一陣相之後就行入去一個地方，俾鐵籠圍住，原來入去就係戦場ヶ原嘅地方。喺個鐵籠係有個鐵閘可以入去，而且係冇鎖到。當我準備入去個陣，個鐵閘前面貼咗一個告示，除咗睇唔明嘅日文之外，仲一個非常出名嘅五個字：
熊出沒注意。

☞ 原來裡面係有熊人喺裡面住，特別係東面嘅日本，總共住咗約一千隻多嘅熊。當時四周環境得我一個人，而我唯一有用嘅裝備就係熊鈴，係之前喺軽井沢買定。當熊人聽到呢啲鈴聲，佢覺得唔舒服就唔會行過嚟，而且去呢啲地方自身安全都好緊要，所以有個熊鈴旁身係必須要。

☞ 我推門入去，的確好有野生地區嘅風味，沿住行一條已經幫你開咗嘅小路。望見側面兩邊，啲草嘅高度係長到我條腰。除咗條路仔，側面嘅草同樹木都生得好茂盛，係普通公園唔會見到嘅。從側面一直望，係見唔森林嘅盡頭。望落係幾特別，但感覺上都醞釀咗陰深嘅氣氛。

【好靚好綠嘅溪水，第二個景點：湯川】

☞ 我自己一路行，熊鈴一直跟住我響起，行咗幾個字終於有兩夫婦行過。感覺都冇咁驚。行多陣就見到一條好靚嘅溪水，好綠，溪流亦都十分清徹，連個兩夫婦都擺出專業姿態不斷影相。

☞ 森林濃密嘅綠色，間中透出太陽嘅光芒，感覺好柔和輸服，好非常鐘意呢種環境。一直行沿住河流嘅出水方向，邊一個位置都係咁靚。

【第三個景點：戦場ヶ原】

☞ 一直行就條路開始邊得難行，啲泥路變到好濕，又有水氹，但係唯一嘅路嚟。自己都著咗對水靴去行，變咗行上去都冇咁狼狽。

☞ 走過呢個位置，開始多人嚟咗，因為啲人可以反方向過嚟，同側邊嘅地方行過嚟，亦都有外國人一齊嚟行，總算有啲人氣。

☞ 再行過少少泥路就變成有木板疊成嘅路，咁就好行好多，即係只要原住木板條路行就冇問題，不過，仲係熊人出沒嘅範圍，其他人行都全部有齊熊鈴嘅裝備。

☞ 一直行見到好廣闊嘅平原，原本嘅森林都唔見。喺平原嘅位置非常大，一望可以望到好遠嘅山，點解日本有呢啲咁大柑空曠嘅地方，仲係一直沿住木板行咗好耐都係咁仲未見盡頭。一直行都覺得好舒服，面對住一個咁大嘅環境，心情靜落嚟，自己都停一停，坐低慢慢欣賞大自然嘅靚境，感覺好爽好正。

☞ 由一開始行都有個幾鐘，但望到呢個廣闊嘅平原真係非常值得，呢個就係戦場ヶ原。

【第四個景點：湯滝】

☞ 由於時間都唔多，自己必須喺一點半搭巴士返日光站，所以欣賞完一陣都要準備繼續起行。

☞ 其實當時自己都行到有啲疲倦，因為剛才係咁行都冇唞過，加上有啲肚餓，但最可惜係冇嘢食，自己冇準備到帶嘢食嚟。不過身處喺戦場ヶ原只有兩個做法，一就喺繼續行到終點，二就係返轉頭，冇其他選擇，而且喺中途位置係冇車會車返自己走，所以自己都要繼續向前行喇。

☞ 開始知道時間都有啲緊張，所以有啲地方唔停得太耐。繼續行開始進入返剛才森林嘅區域，行多一段路就見到另一個同剛才入口一樣嘅鐵閘，一樣都係寫住洪出沒主意。當我見到個閘就知係到達終點嘅地方嚟喇。

☞ 開咗個閘之後上前行一陣就見到一個好大嘅瀑布由頂上流落四散，比之前竜頭ノ滝大好多，更加震憾。喺附近都有一間賣嘢食嘅舖頭，不過可惜係時間唔夠，要趕搭巴士離開，淨係食咗一杯藍色嘅雪糕，不過唔知咩味嚟，覺得特別叫嚟食。

☞ 然後行返上地面就會見到一個湖，叫湯之湖，不過可能開始陰天所以望落唔算靚。喺個湖中見到有人著晒釣魚衫企喺湖較中間位置釣魚，好特別。

☞ 差唔多快到一點半，即刻要溫巴士站喺邊，因為當時仲未見到巴士站嘅牌係邊度，但知班車就快要到，搭唔到就要等下一班巴士，就趕唔切搭JR返市區再去機場。如果趕唔切就返唔到香港。所以嗰陣自己都好急，唔再自己去搵，即刻見有日本人就問巴士站喺邊。因為我本身唔識日文，不過都知日文巴士係BAZU，即係同香港一樣用拼音拼出嚟。

☞ 見到一個似係停車場嘅職員即走埋去問：BAZU，佢就講咗一堆聽唔唔明嘅日文，但知佢係只某一個方向就向嗰方向行一定冇錯，結果真係好快揾到。好好彩，幾分鐘之後架巴士就嚟到。

【差啲趕唔到JR】

☞ 不過想到巴士並不是再冇問題，因為巴士當返到許東照宮嗰邊嘅巴士站，好多人上車，即係話亦同時到總站就有好多人落車。

☞ 但係落車好多都冇準備散銀，去到俾錢嘅時候先喺部收找錢機慢慢換錢然後再數入幾多。日本嘅司機真係好人，係唔會吹你快啲入錢，而且車上仲有好遊客係需要換錢再俾錢，真係等咗兩個字先落到車。

☞ 嗰陣自己喺車上等落車已經係極度心急，但我又冇辦法，所以喺嗰陣自己不段睇錶仲有幾多時間，同埋望住一分鐘一分鐘過去，真係好焦急，因為JR唔會因為架巴士有誤點而等埋你。

☞ 最後到我俾錢完就一嘢衝入車站，真係得返最後一分鐘入閘坐到JR。

【大宮鐵道博物館】

☞ 當我搭JR到宇都宮站再轉新幹線到大宮站，發現都仲有一個鐘時間不如就去埋鐵道博物館。所以最後嘅景都算係去埋鐵道博物館先離開返機場。