第17章 Day2【 高知県:桂浜 】2015-05-01  [值得嚟嘅程度  LEVEL 10/12]

桂濱個沙灘就好靚,人又唔多,個個都係漫步沙灘,感覺非常舒服。高位望落去個海灘可以見到海水係好清,有漸變藍綠色嘅效果,好靚。

自己係一個普通嘅香港打工仔,趁後生三十歲前,自己無咩負擔嘅時候,訂立一個目標去,兩年時間內 (12/2014 - 12/2016) ,分開17次時間,唔識日文情況下,自己一個人遊歷日本47個都道府縣,日後時間都可以令自己回味。

 ☞ http://ao37182.pixnet.net/blog/post/213131848

 ☞ FACEBOOK : https://www.facebook.com/chinginjp/

 
按進入以連結有更多介紹啊❕
值得嚟嘅程度 按進入以連結有更多介紹
Level 10/12 大阪府:難波 / 心斎橋 / 日本橋
Level 10/12 京都府:宇治川
Level 09/12 京都府:大原
Level 11/12 京都府:伏見稲荷
Level 10/12 京都府:鞍馬山
Level 12/12 滋賀県:余呉湖 / 琵琶湖
Level 11/12 京都府:天橋立
Level 07/12 京都府:伊根の舟屋
Level 10/12 京都府:嵐山
Level 10/12 岡山県:岡山後楽園
Level 08/12 島根県:出雲大社
Level 12/12 鳥取県:鳥取砂丘
Level 10/12 山口県:秋芳洞 / 秋吉台
Level 12/12 広島県:厳島神社
LeveL 09/12 山口県:錦帯橋
Level 09/12 香川県:小豆島
Level 10/12 高知県:桂浜

 

 

===================

高知県:桂浜

===================

 

【同一日訂兩間酒店】


 

☞ 呢日我就去咗高知縣,係四國嘅南邊一個縣。咁我住酒店嘅地方都係高知縣高知市,因聽日仲有個景點係喺高知縣,但如果由高松市去聽日嘅地方就要成兩,三個鐘,所以我一定要住高知市,咁聽日就唔會搭咁耐車。但係其實我一早訂晒呢次行程都係喺高松住,但係當我本來想喺呢日轉嚟高松嘅時候,發覺高松市已經係全部酒店冇得訂,因為當時係日本嘅大假嚟,所以驚如果我取消再重新訂過咁就會冇埋手上呢間,酒店超緊張。所以,唯有額外同一日訂多間係高知市,即係同一日訂咗兩間酒店,嘥咗三百幾蚊。

 

【好舒服嘅高松市】


 

☞ 起身之後行去高松站,沿途街上面真係冇咩人又空曠,好舒服,有個餐廳仔,都冇咩人,上到去得另一個客人食緊早餐。我叫咗個漢堡牛肉蛋飯,雖然有其他麵包多士餐,但當時又唔係咁想食。而嘢飲係任斟,成個餐都係七百幾円,而且又可以慢慢食,等夠鐘搭JR,感覺好舒服。

 

☞ 之後就搭JR去多度津站先,中途咁啱有班幼稚園學生都嚟咗搭JR,成班好可愛,諗佢哋應該係去旅行啦。去到多度津站要轉車先可以去都高知市,搭特急列車去高知站,都要個幾鐘先到。

 

【蕩失路揾唔到巴士站】


 

☞ 到咗高知站站前有三個銅像放咗喺度,係板本馬龍嘅銅像嚟,仲有兩個不過就唔清楚佢哋。去桂濱係需要轉巴士先可以到,但當時我就企咗喺度,究竟巴士站係邊度先有。我由北面出口同南面出口揾過都冇,就算有巴士都唔係去桂濱。但本旅遊書明明寫係出站後行前就有個叫XXXX橋嘅巴士。心諗應該附近嚟但點睇都冇,來來回回喺個高知站行咗好耐,終於唔得喇,就問的士司機。佢就講要去桂濱不如搭的士,雖然我唔識日文,但知佢係叫我搭的士。的士好貴,由高知站去桂濱要過萬円。當時我就扮聽唔明,結果最後佢都話我知應該要搭路面電車再係XXXX橋站落車轉巴士就去到。當然唔係就咁佢同我講,而係一路用街上面嘅地圖同我講所以明佢講咩。雖然冇搭到佢的士,但事實上佢哋都好熱心幫其他人。

 

☞ 之後就即刻上路面電車,因為都嘥咗好多時間揾路,嗰陣都一點幾喇。之後到咗XXXX橋站就落車,隔離個巴士站。望埋去就係有架車去桂濱,揾到實在太好。

 

【桂濱】


 

☞ 桂濱係一個海灘嘅地方嚟,不過就冇人會游水,因為佢翻起嘅浪都幾高,衝上沙灘係有可能會捲就個人。不過去到個沙灘就好靚,人又唔多,個個都係漫步沙灘,感覺非常舒服。一直行就會望都有個要上少少樓睇嘅瞭望台,但其實應該係個小型神社嚟,喺海灘邊上面我覺得幾特別。上到去嘅位置唔係好多,有啲逼,所以多人嘅時候要離開俾其他人嚟欣賞或者係參拜。高位望落去個海灘可以見到海水係好清,有漸變藍綠色嘅效果,好靚。

 

【小型水族館】


 

☞ 逗留嘅時間都唔長,大約嗰半鐘都行晒。而旁邊就有個水族館,既然都嚟咗就入去望望。個館旅面都有唔同海洋生物,真係幾千奇百趣,有啲生物真係唔知咩嚟。最令我深印象係類似鱔嘅物體喺幾條管裡面郁嚟郁去,好搞笑。出面嘅地方有好多隻企鵝喺度,不過唔知點解望落去有啲慘嘅情況,可能係覺得企鵝點解會喺啲咁熱嘅地生存。除咗企鵝仲有海獅,肥得嚟真係幾得意。

 

☞ 個館唔算好大所以唔駛太多時間去,而且我去都接近閂門,所以基本上冇咩人。

 

【超大板本馬龍像】


 

☞ 水族館旁邊有個好大嘅板本馬龍像,應該都有三層高,因為隔離有個唔知係裝緊修定係臨時博物館,總之成個場都搭晒架。不過入去係要俾錢,咁我對板本馬龍其實完全唔認識,而且入去全部日文字我都唔會有咩了解,淨係出面係馬龍像影咗啲相就算。

 

【返嚟高知市】


 

☞ 差唔多五點幾就坐返巴士返去高知市,去到六點就好快天黑。第一時間就係揾返我訂咗另一間酒店位置,都唔算難揾。Check-in完之後就休息咗陣然後出去食飯,去咗高知站間居酒屋食嘢。

 

☞ 叫嘢食嗰陣有位職員過嚟,然後跪咗我面前,初初真係嚇親我,自己都唔好意思叫人跪喺度落單。自己都食咗好多嘢,叫咗碟魷魚筒,刺身,蒸蛋,亦都食咗四國最出名嘅雞附骨,簡單嚟講即係雞脾,因為日本食雞肉基本上係冇骨,所以有骨嘅雞一齊食喺當地算特別。另外就叫咗個木桶烏冬麵,因為讚歧烏冬就係四國源產地,點都要食吓,但係食落去就其實都分唔到有咩特別好食。

 

☞ 隔離食飯嘅好多都叫酒飲,佢哋叫嘅酒係職員拎支酒喺佢哋面前斟,仲有係要斟滿瀉先可以,當然個杯外仲有個兜盛住。唔知係唔係坐得耐聞到啲酒味,食完出嚟覺得有啲醉醉哋感覺。

 

☞ 食飽就喺市中心行吓,但係好快收晒檔,嗰陣都係九點鐘左右。條街我覺得好特別,因為每一條街都放有麵包超人嘅公仔喺度,好靚好得意。行多陣,打埋機都十一點幾,連路面電車都收咗,冇咩嘢行就返酒店喇。

 

http://ao37182.pixnet.net/blog/post/213131848

------
桂濱
------

☞ 從JR高知駅換乘とさでん交通桟橋線到棧橋通二丁目乘坐桂浜線巴士至桂浜。

票價 : 大人690円

網址 : http://www.tosaden.co.jp/bus/rosen/timetable/20161001_pdf/27_unchin.pdf?20170215153738

arrow
arrow

    青青 發表在 痞客邦 留言(0) 人氣()